Dirulaguntzak Arautzeko Ordenantza Nagusia

Dirulaguntzak Arautzeko Ordenantza Nagusia

Onespenaren data	2009ko urtarrilak 19
Organo ebazlea	Udabaltza
Indarrean sartzeko data	2009ko urtarrilak 20
Indarraldiaren amaiera data
Aldizkari Ofizialean argitaratutako data	2009ko urtarrilak 19

ATARIKO TITULUA

Xedapen Orokorrak.

I. KAPITULUA

Aplikazio eremua.

1. artikulua. Xedea.

Ordenantza honen xedea da Abadiño Elizateko Udalak dirulaguntzak emateko araubide juridiko nagusia ezartzea.

2. artikulua. Araubide juridikoa.

Abadiño Elizateko Udalak emandako dirulaguntzak jarraian aipatzen direnek arautuko dute: Azaroaren 17ko 38/2003 Dirulagun¬tzei buruzko Lege Orokorra; uztailaren 21eko 887/2006 Errege Dekretua, 38/2003 Legearen Araudia onartzen duena; honako Ordenantza Nagusia; dirulaguntza moten araberako oinarri-arau espezifikoak; eta aurrekontuak betearazteko arauak.

3. artikulua. Dirulaguntza kontzeptua.

1.- Dirulaguntzatzat hartzen da Abadiñoko Udalak egindako diru-erabilera oro, pertsona publikoak zein pribatuak onuradun dituenak, eta honako baldintzak betetzen dituenak:

a) Dirulaguntza onuradunen zuzeneko ordainik barik ematea.

b) Helburu jakin bat bete beharko da dirulaguntza jaso ahal izateko. Helburua izan liteke proiektu edo jarduera bat garatzea edo garatu izana, edota halako jarrera berezi bat izatea, edo osterantzean, ekitaldiren batean parte hartzea; eta ezarri litezkeen eginbehar material eta formalak bete behar ditu onuradunak.

c) Laguntasuna ematen zaion proiektu, ekintza, jarrera edo gorabehera herriaren interes edo onurarako izatea, edo horren bidez helburu publikoren bat bultzatzea.

2.- Kanpoan Abadiño zabaltzeko eragingarritzat hartutako jarduerei emandako dirulaguntzek honako betebeharrak dituzte:

a) Abadiñoren irudia eta izena argi eta garbi agertzea.

b) Ekintzek zabalkunde sozialik handiena izan dezaten ahalegintzea.

c) Ekintzen arrazoi eta helburuetan Abadiño kanpoan bultzatzea xehetasunez azaltzea.

3. Ordenantza honetan ez dira kontuan hartzen hurrengo diru-ekarpenak:

a) Udalak bere erakunde autonomiadunen edo berak parte harturiko sozietate publikoen jarduna erabat finantzatzeko —aurrekontu-araudiari kalterik eragin gabe— udalak egindako ekarpenak.

b) EUDEL Euskadiko Udalen Elkartearen kuotak; eta 7/1985 Legearen —apirilaren 2koa, Tokiko Araubideko oinarriak arautzekoa— Bosgarren Xedapen Gehigarrian aurreikusitako bestelako udalerri-elkarteen kuotak.

c) Talde politikoei egindako ekarpenak.

d) Dirulaguntzei buruzko Lege Orokorrean aurreikusitako bestelako ekarpenak.

II. KAPITULUA

Xedapen Erkideak.

4. artikulua. Aurrekontuetan aurreikustea.

1. Udalaren edo bere erakunde autonomiadunen erabakien bidez baimendutako dirulaguntzek aldez aurretik honakoak izan behar dituzte: aurrekontuetan diru-atal erabilgarria izatea; kreditu atxikipenaren ziurtagiria; eta ebazpena fiskalizatze izapidearen pean jarri izana, Aurrekontuak Betearazteko Udal Arauan ezarritakoari jarraituz..

2. Zuzenbidean erabat deusezak izango dira dirulaguntzak emateko erabakiak, baldin eta aldez aurretik ez badago aurrekontuetan berorietara bideragarri den diru-atal egoki eta nahikorik.

5. artikulua. Printzipio Orokorrak.

1. Dirulaguntzen helburu diren jarduerek erabilera publikoko izan behar dute edo udalaren eskumenen esparruaren barruan kokatu daitekeen interes sozialeko. Baliogabeak izango dira besterik gabe eskuzabaltasunez jokatze aldera erabakitako dirulaguntzen ebazpenak.

2. Dirulaguntzak borondatezkoak eta aldi baterakoak izango dira, eta edozein unetan murriztu edo guztiz ezeztatu ahalko dira, baina beti ere legeak eta arauak betez. Dirulaguntza emateko erabakia aldatzea ekarri lezake dirulaguntza emateko orduan kontuan izandako baldintzak edozelan aldatzeak. Eta aldi berean beste laguntzarik jasotzeak beti ekarriko du erabakia aldatzea, baldin eta arauek baimendutako kasuak ez badira.

3. Ekonomia-jardueretarako ezin daiteke dirulaguntzarik eman, ekonomia-jarduerok berekin badakarte jardute murriztailerik edo kolusiozkorik, konkurrentzia babesten duten Estatuko eta Europako arauetan xedatutakoarekin bat etorriz.

4. Dirulaguntzaren zenbateko osoak (beste erakunde batzuek emandako laguntzak ere aintzat hartuta, halakorik badago) ez du inola ere jardueraren kostu osoa gaindituko.

5. Dirulaguntzak printzipio hauen arabera kudeatuko dira:

a) Publizitatea, merezimendua, gardentasuna, lehia askea, objektibotasuna, berdintasuna eta bereizkeriarik eza.

b) Eraginkortasuna, Abadiñoko Udalak edo bere erakunde autonomiadunek zehaztutako helburuak betetzeko.

c) Eraginkortasuna, baliabide publikoak eratxikitzeko eta erabiltzeko.

6. Dirulaguntza jaso aurretik onuradunek egiaztatu behar dute lehenago jasotako dirulaguntzak justifikatuta dituztela, eta udalarekiko zerga-betebeharrak egunean dituztela. Eta gero, jasotako diruak zelan aplikatu dituzten justifikatu beharko dute.

7. Jasotako diruen aplikazioa justifikatu beharra betetzen ez bada, edo dirulaguntza zein helburutarako eman eta helburuotarako erabiltzen ez badira, edota onuradunei ezarritako betebeharrak betetzen ez badira, orduan onuradunok itzuli beharko dituzte, alde batetik, jasotako kopuruak eta, bestetik, dirulaguntza eman zenetik hura itzuli arteko atzerapen-korrituak.

6. artikulua. Dirulaguntzetarako plan estrategikoa.

1. Dirulaguntzak ezartzea proposatu orduko, Abadiño Elizateko Udalak, aurrekontu-egonkortasuna aintzatetsiz, dirulaguntzen plangintza estrategiko baten zehaztu beharko ditu aplikazioaren bidez lortu gura diren helburu eta eraginak, zein den horiek lortzeko epea, eta zeintzuk diren aurreikusitako kosteak eta finantzatze-iturriak. Plangintza estrategikoak kontuan hartuko du martxoaren 22ko 3/2007 Emakumeen eta Gizonen arteko Benetako Berdintasunerako Lege Organikoaren 35. artikulua.

2. Plan estrategiko hori aurrekontuak onartzearekin batera formulatu daiteke, eta aurrekontuon dokumentazioan sartu daiteke; edo osterantzean, aurrekontuaren tramitaziotik kanpoko plan autonomoa eratu daiteke, osoko udal batzarraren berariazko onespena beharko duena. Edozein kasutan, dirulaguntzak onartzean edo aldaketak onartzean, aldez aurretik edo aldi berean, plan estrategikoa ere onartu edo aldatu beharko da.

7. artikulua. Dirulaguntzak eman ahal izateko betekizunak.

1. Dirulaguntzak ematen hasi aurretik, azaroaren 17ko 38/2003 Dirulaguntzei buruzko Legean ezarritako moduan osatutako oinarri-arauak onartu beharko dira.

2. Dirulaguntza mota bakoitza arautzeko oinarriak Bizkaiko Aldizkari Ofizialean eta Abadiñoko Udalaren iragarki-taulan argitaratuko dira.

3. Dirulaguntzak eman ahal izateko honakoak ere bete behar dira:

a) Dirulaguntza ematen duen administrazio-organoak kasuan kasuko arloan eskumena izatea.

b) Kreditu egoki eta nahikoa egotea, 3. artikuluan ezarritakoarekin bat, dirulaguntza ematea erabakitzeak dakartzan betebehar ekonomikoez kargutu ahal izateko.

c) Dirulaguntza emateko jardunbidea honako ordenantzari eta aplikatzekoak diren gainontzeko arauei lotzea.

d) Ekonomia kutsuko administrazio-egintzak fiskalizatu egin beharko dira aurrez.

e) Eskumendun organoak gastua onestea.

8. artikulua. Onuradunak.

1. Onuraduntzat hartuko da dirulaguntzaren oinarri den jarduera egin behar duena, bai eta dirulaguntza jasotzea zilegi egiten duen gorabeheran dagoena.

2. Onura jasotzen duena pertsona juridikoa denean, eta oinarri-arauetan aurreikusitako kasuetan, pertsona horri elkartutako pertsonak ere hartuko dira onuraduntzat baldin eta dirulaguntza jasotzea zilegi egiten duen jarduera (osoki zein partzialki) egikaritzeko konpromisoa hartzen badute.

3. Nahiz eta izaera juridikorik ez izan, jarraian aipatuko direnak ere hartu litezke onuraduntzat, oinarri-arauetan beren beregi ezarrita agertuz gero, eta baldin eta laguntzaren helburu diren proiektu, jarduera edo gorabeherak egikaritzeko moduan badira. Hona horiek betez gero onuradun izan litezkeenak: Pertsona fisikoen edo juridikoen taldea, publikoak eta pribatuak, ondasun erkidegoak edo osterantzeko unitate ekonomiko edo ondare banatuak. Edozein kasutan ere, taldea ordezkatuko duen pertsona izendatu beharko da, ahalmen aski izan beharko duena taldeari onuradun moduan dagozkion betekizunak betearazteko. Taldea ezingo da desegin, harik eta azaroaren 17ko 38/2003 legean aurreikusten diren itzulketa, arau-hauste eta zehapenen preskripzio-epeak gainditzen diren arte.

4. Onuradun izateko baldintzek eta betebeharrek Espainiako Estatuko oinarrizko legeetan eta Euskal Autonomia Erkidegoko garatze-legeetan ezarritakoari men egingo diete, bai eta Abadiñoko Udalak onartu litzakeen oinarri-arauei eta hitzarmenei ere.

9. artikulua. Onuradunen betebeharrak.

Onuradunek honako betebeharrak dauzkate:

a) Dirulaguntza jasotzea oinarritzen duen helburua betetzea, proiektua egikaritzea, jarrera hartzea edo jarduera egitea.

b) Dirulaguntza eman duen organoari edo erakunde laguntzaileari egiaztatzea, baldintza eta betebeharrei men egin zaiela, bai eta lagundu diren jarduera eta helburua bete egin direla.

c) Dirulaguntza ematen duen organoaren egiaztatze-jarduerak onartuko dituzte, bai eta Espainiako Estatuko edo EAEko beste erakunde eskumendunek egin litzaketen egiaztatze eta finantza kontrolak ere; eta orduan eskatutako informazioa guztia utziko dute eskura.

d) Organo emaileari edo erakunde laguntzaileari jakinaraztea ea helburu bererako bestelako laguntza, dirulaguntza, diru-sarrera edo baliabiderik jaso duten ala ez.

Horren berri izan bezain laster jakinarazi beharko da, eta nolanahi ere, jasotako diruei emandako aplikazioa egiaztatu baino lehenago.

e) Zerga eta Gizarte Segurantzarekiko betebeharretan egunean egotea egiaztatzea, dirulaguntza emateko ebazpen-proposamena baino lehenago.

f) Kontabilitate liburuak, dilijentzia eginda duten erregistroak eta behar bezala ikuskatutako gainontzeko agiriak izatea, kasu bakoitzean onuradunari aplikatu dakiokeen merkataritza eta arlokako legediaren arabera, bai eta dirulaguntzen oinarri-arauetan eskatzen diren berariazko erregistroak eta kontabilitate orriak ere, egiaztapena eta kontrola egiteko ahalmenak egoki betetzen direla bermatzeko.

g) Jasotako diruak behar bezala aplikatu direla egiaztatzeko balio duten agiriak gordetzea, egiaztatze eta kontroletarako baliagarriak direlako.

h) Diruz laguntzen diren programa, jarduera, inbertsio edo ekintzen berri emateko, legearen arabera ezarritako moduak erabiltzea, diru publikoaren bidez finantzatu direla agertuz, bai eta indarrean dagoen hizkuntza araudia errespetatuz eta hizkera eta irudi ez sexistak erabiliz.

i) Legeak aurreikusitako kasuetan jasotako diruak itzultzea.

10. artikulua. Erakunde laguntzaileak.

1. Hauek hartuko dira erakunde laguntzailetzat: Batetik, dirulaguntzari dagokionez Abadiño Elizateko Udalaren izenean arituz diru-publikoak eman eta banatzen dizkietenak onuradunei, hala jasoz gero oinarri-arauetan; bestetik, jasotako diruak eman eta banatu aurretik diruon kudeaketan lankidetzan aritzen direnak.

Diruok ez dira hartuko inoiz erakunde hauen ondaretzat.

Era berean erakunde laguntzailetzat hartuko dira erkidegoko araudiaren arabera onuradun izendatu diren pertsona fisiko edo juridikoak, baldin eta aurreko paragrafoan zerrendatutako funtzio edo ardurak esklusiboki eurei eman bazaizkie.

2. Erakunde laguntzailetzat ondokoak ere hartu litezke. a) erakunde eta bestelako antolakunde publikoak, herri-administrazioek osorik edo gehiengoz parte harturiko enpresak, zuzenbide publikoko erakundeak eta apirilaren 2ko 7/1985 Legearen —Tokiko Araubidearen Oinarriak arautzekoa— bosgarren xedapen gehigarrian adierazitako elkarteak.

11. artikulua. Erakunde laguntzaileen betebeharrak.

Erakunde laguntzaileen betebeharrak dira:

a) Dirulaguntzaren oinarri-arauetan ezarritako irizpideei eta Abadiñoko Udalarekiko hitzarmenari jarraituz ematea jasotako diruak, onuradunei.

b) Egiaztatzea, hala badagokio, dirulaguntza emateko erabakiorrak izandako baldintza eta betekizunen betetze eta eraginkortasun maila, bai eta jarduera egiten dela eta dirulaguntza ematea edo izatea dakarren helburua betetzen dela ere.

c) Diruak onuradunei eman egin zaiela egiaztatzea Abadiñoko Udalari, eta, hala badagokio, onuradunek aurkeztutako egiaztagiriak ematea udalari.

d) Diruok kudeatzearen inguruan Abadiñoko Udalak egin litzakeen egiaztatze-jarduerei men egitea, bai eta Espainiako Estatuko edo EAEko beste erakunde eskumendunek egin litzaketen egiaztatze eta finantza kontrolak ere onartzea; eta horretarako eskatu lekiekeen informazio guztia eskura uztea.

12. artikulua. Onuraduna edo erakunde laguntzailea izateko baldintzak.

1. Pertsona edo erakundeek lortu dezakete onuradun izaera edo erakunde laguntzaile izaera, dirulaguntzak oinarritzen dituzten egoeraren batean badaude, edo oinarri-arauetan eta deialdian jasotako gorabeheretan badaude.

2. Ezingo dute onuradun edo erakunde laguntzaile izaerarik lortu hurrengo gorabeheraren baten dauden pertsona eta erakundeek, ezpada dirulaguntza mota jakina dela-eta bere oinarri-arau bereziek salbuesten badute.

a) Epai irmoaren bidez dirulaguntza eta laguntza publikoak lortzeko aukera galtzera kondenatuta daudenak.

b) Konkurtso deklarazioa eskatuta egotea, edozein prozeduratan audimengabekotzat deklaratuta egotea, konkurtsoan deklaratuta egotea, kontu-hartze judizialaren barruan egotea edo Konkurtso Legearen arabera ezgaituta egotea,baldin eta konkurtsoaren kalifikazio epaian jarritako ezgaitasun epea amaitu gabe badago.

c) Administrazioarekin egindako edozein kontraturen suntsiarazpen irmoa eragin dutenak, errudun deklaratuak izan badira.

d) Pertsona fisikoa, enpresen administratzaileak edo beste pertsona juridikoak legez ordezkatzen dituztenak, ondoren aipatutako legeetan jasotzen diren bateraezintasun-egoeraren baten egonez gero. Hona arlo honi dagozkion legeak: Estatuko Gobernuko kideen eta Estatuko Administrazio Nagusiko goi-kargudunen bateraezintasunei buruzko legea, Eusko Jaurlaritzako kide eta goi-kargudunen bateraezintasunez dagoen legedia, Herri Administrazioen Zerbitzura dauden Langileen Bateraezintasunei buruzko Legea. Edo, bestalde, edozelako kargudun hautetsia izatea, hauteskunde legedi nagusian eta EAEkoan ezarrita dagoen moduan.

e) Zerga-betebeharretan eta Gizarte Segurantzarekiko betebeharretan egunean ez egotea.

f) Helbide fiskala paradisu fiskaltzat hartutako herrialde edo lurralderen baten izatea.

g) Dirulaguntzak itzultzeko betebeharrean egunean ez egotea.

h) Dirulaguntzak ez jasotzeko zigorra izatea, ebazpen irmoren bidez, dirulaguntzak arautzeko Espainiako Estatuko legedi orokorraren eta Foru Zerga Lege edo Arau Orokorraren arabera.

3. Aurreko atalean ezarritako debekuetan sartuta ez egotearen egiaztapena honela egin daiteke: lekukotza judizialaren bidez edo ziurtagiri telematiko edo datu-transmisio bidez, kasuen araberako araudian edo administrazio-zirtagirian ezarritakoriari jarraituz. Ziurtagiria dagokion agintaritzak jaulki ezin duenetarako, balio egingo du administrazioaren edo notario baten aurrean egindako erantzukizunpeko aitorpenak.

13. artikulua. Oinarri-arauak.

Dirulaguntzen oinarri-arauek gutxienez hurrengoak zehaztuko dituzte:

a) Dirulaguntzaren xedea eta helburua.

b) Dirulaguntza lortzeko onuradunek bete beharrekoak.

c) Eskariak aurkezteko modua eta epea.

d) Pertsona juridikoek bete beharreko kaudimen- eta eraginkortasun-baldintzak, 38/2003 Legearen 12. artikuluko 2. paragrafoan jasotako moduan.

e) Dirulaguntza emateko prozedura.

f) Dirulaguntza emateko irizpide objektiboak, eta dagokionean, horien zuhurtasuna.

g) Dirulaguntza bakoitzaren zenbatekoa edo hura zehazteko irizpideak.

h) Dirulaguntza emateko agindua, ikuskapena, eta ebazpena egiteko organo eskudunak eta ebazpena jakinaraziko den epea; bai eta zein diren administrazioaren isiltasunaren ondorioak.

i) Dagokionean, berariazko kontabilitate liburu eta erregistroen zehazpena, dirulaguntza behar bezala egiaztatzen dela bermatzeko.

j) Onuradunak (edo erakunde laguntzaileak) dirulaguntzaren helburua bete duela eta jasotako diruak aplikatu dituela ziurtatzeko modua eta epea.

k) Dagokionean, dirulaguntza ematen duen organoaren alde eratu beharreko berme-neurriak, eratze-baliabideak eta baliogabetze-prozedura.

l) Aurretik ordaintzeko eta ordainketak kontura egiteko aukera; eta dagokienean, onuradunek eman beharreko berme-araubidea.

m) Dirulaguntzak ematean kontuan hartu ziren gorabeherak aldatuz gero, zein gorabeherek eragin lezaketen ebazpena aldatu beharra.

n) Helburu bera duten beste dirulaguntza, laguntza, sarrera edo baliabideekiko — jasotakoak edozein administrazio edo erakunde publiko edo pribatutatik, Espainiako Estatukoetatik, Europako Batasunetik edo nazioarteko erakundeetatik— bateragarritasun edo bateraezintasuna.

o) Dirulaguntza jasotzeko ezarritako baldintzak ez betetzearen mailen irizpideak. Irizpide horiek aplikatuko dira onuradunak, azkenean, jaso behar duen zenbatekoa zehazteko, edo dagokionean, itzuli beharreko zenbatekoa zehazteko. Proportzionaltasunaren printzipioan oinarrituta egon beharko dira.

p) Diruz lagundutako jarduera egikaritzeko —osorik edo partzialki — hirugarrenak azpikontratatzea onartzen den ala ez.

Dirulaguntzen oinarri-arauak organo eskudunak onartuko ditu, zerbitzu juridikoen txostena izan ostean. Eta Bizkaiko Aldizkari Ofizialean eta Abadiño Elizateko Udaleko iragarki-taulan argitaratuko dira oinarri-arauok.

14. artikulua. Emandako dirulaguntzen publizitatea.

1. Abadiño Elizateko Udaleko iragarki-taulan iragarriko dira emandako dirulaguntzak, eta honakoak adieraziko dira bertan: deialdia, programa eta egotzitako aurrekontu-kreditua, onuradunak, emandako zenbatekoa eta dirulaguntzaren helburua edo helburuak.

2. Era berean, emandako dirulaguntzen zerrenda udaleko iragarki-taulan argitaratzeko agintzen duen ebazpenaren zati bat argitaratuko da Bizkaiko Aldizkari Ofizialean, eta bertan eduki osoa eskura non dagoen adieraziko da.

3. Hurrengo egoeretan ez da izango beharrezkoa Bizkaiko Aldizkari Ofizialean argitaratzerik:

a) Dirulaguntzek esleipen nominala dutenean Abadiño Elizateko udal aurrekontuan.

b) Onuradun jakin baten alde emandako dirulaguntzaren zenbatekoa lege-mailako arau baten arabera ezartzen denean.

c) Banaka emandako dirulaguntzen zenbatekoa 3000 euro baino gutxiagokoa denean. Egoera honetan, kasuan kasuaren ezaugarri bereziak kontuan hartuz, oinarri-arauek osterantzeko prozedurak jaso beharko dituzte onuradunen dirulaguntzak publizitatzea bermatzeko.

d) Maiatzaren 5eko 1/1982 Lege Organikoan — Ohorerako, Norberaren eta Familiaren Intimitaterako, eta Norberaren Irudirako Eskubidearen Babes Zibilari buruzkoa — ezarritakoaren arabera dirulaguntzen helburua pertsona fisikoen errespetu eta babesaren nahiz intimitate pertsonal zein familiarraren aurkakoa denean, eta dirulaguntza horiek arautzen dituzten oinarrietan horrela jasota dagoenean.

4. Hiruhilabeteko naturalaren hurrengo hilean argitaratuko dira emandako dirulaguntzak eta argitaratze horretan kontuan hartuko dira hiru hilabeteko epe horretan emandako dirulaguntza guztiak, emateko prozedura eta egiteko moldeak direnak direla. Beti ere, argitaratzetik salbuesten ez baditu legediak.

15. artikulua. Dirulaguntza publizitatzea onuradunak.

Diruz lagundutako edozelako programa, jarduera, inbertsio eta ekintzak diru publikoz finantzatu direla onuradunek modu egokian publizitatu behar dute, emandako dirulaguntzari dagozkion oinarri-arauetan xedatutakoari jarraituz.

16. artikulua. Dirulaguntzen kudeaketaren informazioa.

1. Estatistikak egiteko beste xederik ez dagoela, kudeatutako dirulaguntzen inguruko informazioa emango die Abadiñoko Udalak IGAEri (Estatuko Administrazioko Kontu-Hartzailetza Nagusia) edota EAEko eta Foru Aldundiko kontu-hartzailetzei; beti ere legedian jasota dagoen moduan, eta estatu mailako edo EAEko datu-basea eratzeko asmoz, hala Europako Batasunaren eskaria betez, hau da, eraginkortasuna hobetzeko, dirulaguntzen metatze eta konkurrentziak kontrolatzeko, eta kontrolerako plangintza, jarraipen eta jardunak errazteko helburuz.

2. Ukitutako pertsonaren baimenik ez da beharko Aurreko paragrafoan ezarritako moduan izaera pertsonaleko datuak Estatuko Kontu Hartzailetza Nagusiari eta automomia erkidegoko administrazioari edo foru administrazioari lagatzeko.

3. Agintari eta funtzionarioak datu horiekiko sekretu profesional zurrun eta osoenera behartuta daude.

I TITULUA

Dirulaguntzak emateko prozedurak eta kudeaketa

I. KAPITULUA

Dirulaguntzak emateko prozedurak.

17. artikulua. Dirulaguntzak emateko prozedurak.

1. Dirulaguntzak emateko ohiko prozedura norgehiagoka bidezkoa izango da. Hartara, aurkeztutako eskabideak alderatuta egingo da prozedura, oinarri-arauetan eta deialdian aldez aurretik ezarritako irizpideen arabera eskabideen arteko balorazio lehentasunak ezartzeko, eta deialdian kreditu erabilgarriaren barruan finkatutako muga izanda, aipatutako irizpideak aplikatuta baloraziorik handiena izan dutenei esleitzeko.

Salbuespen moduan, eta betiere oinarri-arauetan jasota baldin badago, organo eskudunak dirulaguntzen gehienezko zenbatekoa proportzionalki banatuko du onuradunen artean.

2. Zuzenean eta behar bezala justifikaturik, hurrengo dirulaguntzak eman ahal izango dira:

a) Abadiñoko udal aurrekontu orokorretan nominatiboki aurreikusitakoak, dirulaguntzon hitzarmenean eta araudian ezarritakoaren arabera.

b) Lege mailako arauren baten bitartez ematea edo zenbatekoa ezarrita daukatenak. Dirulaguntza hauek emateko prozedura dagokien berariazko araudiari lotuko zaie.

c). Salbuespenez, deialdi publikoa egitea gaitza izanik, interes publikokoa, gizarte edo ekonomia mailakoa, humanitarioa, edo antzeko arrazoiren bat dutelako nahiko argudio dagoenean ematekoak.

3. Ez da deialdian ezarritako zenbatekoa gainditzen duen dirulaguntzarik emango.

II KAPITULUA

Dirulaguntzak lehia bidez emateko araubidea

18. artikulua. Hasiera.

1. Dirulaguntzak emateko prozedura beti ofizioz hasiko da.

2. Ofizioz hasiko da, udaleko Gobernu Batzordeak onartutako deialdi bidez, eta dirulaguntzak emateko prozedurari jarraituz, hau da, honakoei jarraituz: honako ordenantza; azaroaren 17ko 38/2003 Legea, Dirulaguntzen Orokorra; Administrazio Publikoen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen Oinarriak. Era berean, nahitaez hurrengoak jasoko ditu:

a) Oinarri-arauak eta eurak argitaratu diren aldizkari ofiziala; oso berariazkoak izateagatik horiek guztiak deialdian bertan aipatzen direnean izan ezik.

b) Dirulaguntzaz kargutzen diren aurrekontu-kredituak eta kreditu erabilgarriak kontuan izanik egindako deialdietako dirulaguntzen gehienezko zenbatekoa, edo osterantzean, dirulaguntzen kopuru gutxi-gorabeherakoak.

c) Dirulaguntzen xedea, baldintzak eta helburua.

d) Dirulaguntza norgehiagoka bidez emango dela adieraztea.

e) Dirulaguntza eskatzeko baldintzak eta horiek egiaztatzeko modua.

f) Prozedura ikuskatzeko eta ebazteko organo eskudunak aipatzea.

g) Eskaerak aurkezteko epea eta tokia.

h) Ebazteko eta jakinarazteko epea.

i) Eskabidearekin batera ekarri beharreko agiri eta informazioak.

j) Eskabideak berriro egiteko aukera, halakorik badago.

k) Ebazpenak administrazio-bidea agortzen duen ala ez adieraztea.

l) Eskaerak baloratzeko irizpideak.

m) Ebazpena jakinarazteko edo argitaratzeko bidea, azaroaren 26ko 30/1992 Legearen —Administrazio Publikoen Araubide Juridikoari eta Administrazio Prozedura Erkideari buruzkoa— 59. artikuluan ezarritakoaren arabera.

n) Proiektua finantzatzeko onuradunak ipini beharreko ehunekoa, bai onuradunaren beraren dirua erabilita bai beste dirulaguntzen bidez.

ñ) Azpikontratatzerik badagoen.

o) Konturako ordainketak eta ordainketa zatikatuak egin litezkeen.

p) Kontu zurigarria aurkezteko modua eta epea.

3. Deialdia Abadiñoko udaletxeko iragarki-taulan eta Bizkaiko Aldizkari Ofizialean argitaratuko da.

19. artikulua. Eskariak aurkezteko modua, tokia eta epeak.

1. Eskabidea dagokion deialdian ezarritako epean aurkeztuko da Abadiño Elizateko Udalaren sarrera-erregistroan, edo bestela, 30/1992 Legearen —Herri Administrazioen Araubide Juridikoaren eta Administrazio Prozedura Erkideari buruzkoa— 38. artikuluan ezarritako beste bideetakoren bat erabili liteke. Eperik adierazi ezean, hamabost lanegunekoa izango da, iragarkia BAOn argitaratu eta biharamunetik zenbatzen hasita.

2. Interesdunek eskariekin batera oinarri-arauetan edo deialdian eskatutako agiriak aurkeztuko dituzte. Eskatutako dokumenturen bat administrazio jardulearen organoren batera aurrez aurkeztua baldin bada, eskatzaileak erabili dezake 30/1992 Legeak 35. artikuluko f) paragrafoan xedatzen duena, baina agiriak zein egun, organo edo bulegotan jaso edo egin ziren adierazi beharko dute, beti ere dokumentu horiek loturik diren prozedura amaitu eta bost urte baino gehiago igaro ez bada.

3. Agiria eskuratu ezin denean, organo eskudunak eskatzaileari eskatu diezaioke agerraldia egiteko, edo osterantzean, eskuratu ezin den agiri horrek azaltzen dituenak beste bideren batez ziurtatu ditzala, aurkeztu ere ebazpen proposamena egin baino lehen.

4. Eskabideak eta gainontzeko agiri osagarriak bide telematikoz aurkezten direnean, Administrazioko Prozedura Erkidearen araudian xedatutakoaren arabera egingo da.

5. Oinarri-arauetan jasotzen ez bada ere, eskabidearekin batera honakoak ere aurkeztu beharko dira:

a) Interesdunaren edo haren legezko ordezkariaren NA edo IFK txartelaren fotokopia.

b) Zinpeko aitorpena, non ziurtatuko den jarduera horren bidez ez dela irabazirik lortu gura.

c) Erakunde edo elkartearen estatutuen fotokopia, irabazi asmorik bako elkarteak direnetan.

d). Zerga betebeharrak eta Gizarte Segurantzarekikoak egunean izatearen ziurtagiria.

f) Diruz laguntzen den helburua, proiektua, jarduera edo jarrera berezia burutzeko asmoz egitekoak diren egintzen memoria, honakoekin batera: sarrera-irteeren aurrekontua, egiteko aurreikusitako epeak eta datak, aurreikusitako helburuen deskribapena, metodologia, zein bizilagun motarendako zuzenduta dagoen eta zer lortu gura den. Aurkeztutako datuek bete beharko dute otsailaren 18ko 4/2005 Legea, Emakumeen eta Gizonen Berdintasunerakoa.

g) Eskatutako edota jasotako dirulaguntzen zinpeko aitorpena, beste administrazio edo erakunde publiko zein pribaturi dirulaguntza eskatu bazaio edo haiengandik dirulaguntza eskuratu bada.

h) Dirulaguntza lortzeko argudiatutako merituak ziurtatzeko agiriak.

6. Oinarri-arauetan jaso liteke agiri jakinak ordezkatu ahal izatea eskatzailearen aitorpen erantzukizundunaren bidez. Kasu horretan, dirulaguntza emateko ebazpen-proposamena egin baino lehenago, aipatutako aitorpenean jasotako datuak ziurtatzeko 15 eguneko epea ezarriko da agiriak aurkezteko.

7. Onuradunak eskabidea aurkezteak berak berarekin dakar Abadiño Elizateko Udalari baimena ematea Zerga Administrazioak eta Gizarte Segurantzaren Diruzaintza Nagusiak jaulki beharreko ziurtagiriak eskuratzeko.

20. artikulua. Aurkeztutako eskabidean egindako okerrak zuzentzea.

Deialdian eta oinarri-arauetan ezarritako baldintzak ez baditu betetzen eskariak, organo eskudunak interesdunari eskatuko dio okerrak 10 eguneko gehienezko epe luzaezinean zuzentzeko. Epe hori agortutakoan zuzenduko ez balu, eskatzaileak berak eskabidea atzera bota duela ulertuko litzateke, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 71.1 artikuluaren arabera.

21. artikulua. Izapidetzea.

1. Dirulaguntzak emateko prozedura izapidetzea deialdian ezartzen den organoari dagokio.

2. Zerbitzu kudeatzaileak ofizioz egingo ditu datuak zehaztu, jakin eta egiaztatzeko egokitzat jotzen dituen jarduera guztiak, eta horiek oinarri hartuta egin beharko da ebazpen-proposamena.

3. Honako hauek burutu beharko dira izapidetze-jardueretan.

a) Zerbitzu kudeatzailearen txostena, adieraziz, bere esku daukan informazioaren arabera, eskatzaileek dirulaguntzetarako baldintza guztiak betetzen dituztela.

b) Egindako eskabide edo eskaerak dirulaguntzen oinarri-arauetan edo deialdian ezarritako irizpide, modu eta balorazio lehentasunen arabera ebaluatzea.

c) Kontu-hartzailetzaren txostena.

4. Behin eskaerak ebaluaturik eta informaturik, zerbitzu kudeatzaileak dirulaguntzak emateko proposamena egingo dio dagokion informazio-batzordeari.

Informazio batzordeak proposamenaz ebatzi beharko du, eta ondoren organo eskudunak onartu beharko du.

Prozeduran hala jasotzen den kasuetan eta interesatuek ez bestek adierazitako gertaera, alegazio eta frogak kontuan hartzen direnean, espedientea eta kide anitzeko organoaren irizpena ikusi ondoren, zerbitzu kudeatzaileak behin-behineko ebazpen-proposamena jakinaraziko die interesatuei, behar bezala argudiatuta; eta 10 eguneko epea emango du alegazioak aurkezteko.

Interesatuek ipinitako alegazioak aztertu ostean, zerbitzu kudeatzaileak behin-betiko ebazpen-proposamena egingo du ondoren ebazpena izan dadin.

Entzuteko tramitea bazter batean utzi daiteke interesdunak aurkeztutakoez gainera, jardunbidean beste ekintza, alegazio edo frogarik aurkezten ez bada edo kontuan hartzen ez bada.

5. Ez behin-behineko ebazpen-proposamenek, ez behin betikoek ere ez dute proposatutako onuradunaren aldeko administrazioarekiko eskubiderik sortzen, harik eta dirulaguntza ematen zaiolako ebazpena jakinarazten zaion arte.

22. artikulua. Ebazpena.

1. Ebazpen-proposamena behin onarturik, organo eskudunak dirulaguntzak emateko prozedura ebatziko du.

2. Ebazpena egiteko epea hamabost egunekoa izango da, organo eskudunak proposamena jaso duen egunetik zenbatzen hasita.

3. Ebazpena arrazoituko da dirulaguntzaren oinarri-arauetan ezarritakoaren arabera, eta betiere, prozeduran ziurtatu beharko dira hartutako ebazpenaren oinarriak.

Ebazpenean azalduko dira entitate onuradunak banan-banan, bakoitzari egokitutako diru kopurua eta onuradunen betebeharrak zeintzuk diren, bai eta ezetsitako beste eskariak ere, eta bertan behera gelditu direnak eskatzaileek atzera bota dituztelako eskariak edo eskubideari uko egin diotelako, edo ezintasun material eta ezustekoagatik.

4. Dirulaguntzak emateko ebazpenak administrazio-bidea agortzen du, legean edo oinarri-arauetan kontrakorik ezarrita ez badago.

5. Prozeduraren ebazpena egiteko eta jakinarazteko gehienezko epea sei hilabetekoa da, deialdia argitaratzen den biharamunetik zenbatzen hasita, baldin eta ez bada deialdian bertan gerorako beste egunen bat zehazten.

6. Ezarritako gehienezko epea igarota ebazpena ez bada jakinarazi, interesatuek ulertu beharko dute administrazioaren isiltasunez eskaria ezetsi egin dela.

23. artikulua. Ebazpena jakinaraztea.

1. Prozeduraren ebazpena interesatuei jakinaraziko zaie azaroaren 26ko 30/1992 Legearen —Administrazio Publikoen Araubide Juridikoari eta Administrazio Prozedura Erkideari buruzkoa— 58. artikuluan ezarritakoaren arabera. Jakinarazpen edo argitalpen hori aipatutako legearen 59. artikuluan jasotako xedapenei lotuko zaie.

2. Dirulaguntzak onuradunak onartu egin duela ulertuko da jakinarazpena jaso duenetik hamar eguneko epean, kontrakorik adierazten ez badu.

III. KAPITULUA

Dirulaguntzak zuzenean emateko prozedura.

24. artikulua. Dirulaguntzak zuzenean ematea.

Diruz lagundu behar den jardueraren izaera edo jarduera egin behar duen pertsonaren edo erakundearen ezaugarriak direla-eta lehiaketa publikoa ezin denean egin, dirulaguntzak organo eskudunen erabaki edo ebazpen behar bezalako arrazoituaren bidez emango dira, eta bertan azalduko da zergatik den salbuespena, hau da, zergatik ez den lehiaketarik egin, eta jasotako diruak justifikatzeko modua zein izango den. Kasu guztietan dagokion espedientea tramitatuko da.

Edozein kasutan ere, espedienteak ezinbestekotzat izango du indarrean dagoen kontabilitate- eta aurrekontu-araudiaren arabera gastua onartzeko tramitea egitea, behar bezala arrazoituta, eta batez ere Aurrekontuen Exekuziorako Udal Araudian jasotako tramiteak.

Normalean hitzarmen bidez bideratuko dira Aurrekontu Orokorrean jasotako dirulaguntza izendunak, honetaz oinarri-arauek ezarri dezaketenaren kaltetan izan gabe.

Hitzarmenetan gutxienez ondokoak jasoko dira:

a) Dirulaguntzaren xedearen definizioa, dirulaguntzen berezitasuna aipatzea eta arrazoitzea alde batetik zergatik den interes publikoko, sozialeko, ekonomikoko edo humanitarioko, eta bestetik zergatik ezin izan den deialdi publikorik egin.

b) Zuzenbide-araudi aplikagarria.

c) Onuradunak eta laguntza-motak.

d) Dirulaguntza emateko prozedura eta onuradunek edo erakunde laguntzaileek dirulaguntza zelan aplikatu duten justifikatzeko bidea

IV. KAPITULUA

Aurrekontua kudeatzeko prozedura.

25. artikulua. Gastua eta ordainketa onartzeko prozedura.

1. Dirulaguntzen deialdia baino lehenago, eta zuzeneko dirulaguntzak eman aurretik, aurrekontu-araudian ezarritakoaren arabera gastua onartu beharko da.

2. Bai dirulaguntza emateko ebazpenak bai hitzarmena sinatzeak eurekin dakarte gastua egiteko konpromisoa.

3. Dirulaguntza ordainduko da behin laguntza emateko oinarri izan zen jarduera, proiektua, helburua edo jokabidea onuradunak justifikaturik.

Dirulaguntza kobratzeko eskubidea galduko da, osorik edo zati batean, justifikatzerik ez dagoenean edo dirulaguntza itzultzeko kausaren bat suertatzen denean.

4. Dirulaguntzaren izaerak justifikatzen duenean, konturako ordainketak egin ahal izango dira. Konturako ordaintze hauek atalka egin litezke, diruz laguntzen diren jarduerak egiten joan ahala, eta aurkeztutako justifikazioen arabera.

Justifikazioaren aurretik ere ordainketak egin ahal izango dira, kopuru osoaren % 80 gainditzen ez bada,eta dirulaguntzarekin lotutako ekimenak egin ahal izateko helburuz.

Konturako ordainketak, baita aldez aurretik eginikoak ere, eta bermerako araubidea ere bai beren beregi jaso beharko dira oinarri-arauetan.

5. Dirulaguntza ezingo zaio onuradunari ordaindu baldin-eta ez badago egunean zerga-betebeharretan eta Gizarte Segurantzarekiko betebeharretan, edo itzulketa-prozeduraren bateko zordun bada.

V. KAPITULUA

Kudeatze prozedura eta dirulaguntzaren justifikazioa.

26. artikulua. Diruz lagundutako jarduerak azpikontratatzea onuradunak.

1. Ordenantza honen ondoreetarako hauxe da azpikontratazioa: dirulaguntzaren xedean den jarduera osoa edo atalen bat egikaritzeko onuradunak hirugarren batekin egiten duen hitzarmena. Kontzeptu honetatik kanpo gelditzen da onuradunak berak jardueraren garapenaren gastuak kontratatzea.

2. Onuradunak azpikontratatu ahal izanago du, bai jarduera osoa bai atalen bat, soilik dirulaguntzaren araudiak hala jasotzen baldin badu. Onuradunak hirugarrenei azpikontratatutako diruz lagundutako jarduera ez da izango dirulaguntzaren oinarri-arauetan zehaztutako ehunekoa baino handiagoa. Zehaztutako ehunekorik ez balego, diruz lagundutako jardueraren zebatekoaren % 50 arte ahal izango da azpikontratatu.

Inoiz ere ezingo da diruz lagundutako jardueraren kostea handitzen duen eta balio gehigarririk ekartzen ez duen jarduerarik azpikontratatu.

3. Hirugarren pertsonekin hitzartutako jarduerek dirulaguntzaren % 20 gainditzen dutenean, eta dagokien zenbatekoa 60.000 euro baino gehiago bada, azpikontratazioak honako betebeharrak dakartza:

• Abadiño Elizateko Udalak kontratuok egiteko baimena eman beharko du, beren beregi eta aldez aurretik.
• Kontratua idatziz jasoko da.

Kontratua ezingo da zatikatu zenbatekoa gutxitu eta hala arestian jasotako betebeharrei izkin egiteko.

4. Kontratua egiten dutenek onuradunaren aurrean baino ez dute erantzukizunik izango; eta administrazioaren aurrean, diruz lagundutako jarduera egikaritzeko erantzukizun osoa onuradunak izango du.

Beraz, hirugarren pertsonekin hitzartutako jarduera —diruz lagundutakoa— egikaritzean, oinarri-arauetan ezarritako mugak —gastuen izaera eta zenbatekoak— errespetatzeko erantzukizuna onuradunena izango da. Eta kontratistek azpikontratatzearen legezko eta arauzko mugak betetzen diren egoki egiaztatzeko orduan kontratistek eurek kolaboratzeko legezko betebeharra dute.

5. Onuradunak inoiz ere ezingo du hitzartu lagundutako jarduerak osorik edo zati batez egitea ondoko hauetariko inorekin:

a) Onuradun edota erakunde laguntzaile izatea legez galazota duten pertsonak eta erakundeak.

b) Kontratazioaren xedea den jarduera egiteko beste dirulaguntzarik jaso duten pertsonak eta erakundeak.

c) Ordainketak eragiketaren kostu osoaren ehuneko baten arabera zehazten direneko bitarteko edo aholkulariak. Behinik behin, ordainketa hori egindako lanaren edo zerbitzuen merkatu-balioari erreferentzia eginez justifikatu ezean.

d) Pertsona onuradunarekin zerikusia duten pertsonak eta erakundeak, behinik behin ondoko baldintzak bete ezean:

• Kontratazioa merkatuko baldintza normalen arabera egitea.
• Aldez aurretik organo emailearen baimena lortzea, oinarri-arauetan zehazten denaren arabera.

27. artikulua. Dirulaguntza jaso dezaketen gastuak.

1. Ondoko hauek dira dirulaguntza jaso dezaketen gastuak: batere zalantzarik gabe lagundutako jardueraren izaerarekin bat datozen eta oinarri-arauetan ezarritako epeen barruan egiten diren gastuak. Dirulaguntza jaso dezaketen gastuen eskuratze-balioa inola ere ezingo da izan merkatuko balioa baino handiagoa.

2. Egindako gastutzat hartuko da, dirulaguntzari buruzko oinarri-arauetan beren beregi kontrakoa xedatu ezean, hura erregulatzeko arauetan zehaztutako justifikazio-epea amaitu baino lehen benetan ordaintzen dena.

3. Dirulaguntza jaso dezakeen gastuaren zenbatekoa 30.000 eurotik gorakoa bada obra egitearen ziozko kostuaren kasuan, eta 12.000 eurotik gorakoa bada aholkularitza edo laguntza teknikoko enpresek ekipo ondasunak hornitu edo zerbitzuak egitearen kasuan, pertsona onuradunak hiru hornitzaileren eskaintzak eskatu beharko ditu gutxienez, zerbitzua egiteko edo ondasuna emateko konpromisoa hartu baino lehen. Hori ez da beharrezkoa izango baldin eta, dirulaguntza jaso dezaketen gastuen ezaugarri bereziengatik, merkatuan ondasun edo zerbitzuok hornitu edo egiten dituen hainbeste entitaterik ez badago, edo gastua dirulaguntza eskatu baino lehen egin bada.

Aurkezten diren eskaintzak justifikazioan, edo kasuan kasuako dirulaguntzarako eskabidean azaldu behar dira, eta, haien artean aukeratzeko, eragingarritasun- eta ekonomia-irizpideen arabera jokatuko da. Hala, diruaren aldetiko proposamen onena aukeratzen ez denean, beren beregi justifikatu beharko da txosten baten bidez.

4. Ondoko hauek inoiz ere ez dira hartuko dirulaguntza jaso dezaketen gastutzat:

a) Banku kontuetako interes zordunak.

b) Interes, errekargu eta zehapen administratibo eta penalak.

c) Prozedura judizialen gastuak.

d) Pertsona Fisikoen Errentaren gaineko Zerga, Sozietateen gaineko Zerga, eta zeharkako zergak, berreskuratu edo konpentsatu daitezkeenean.

e) Inbentarioan sar daitezkeen ondasunak eskuratu, eraiki, birgaitu eta hobetzea.

5. Zeharkako kostuei dagokienez, arrazoizkoa den zatia — eskuarki onartutako kontabilitate-arau eta printzipioen arabera— egotziko dio pertsona onuradunak lagundutako jarduerari, eta, beti ere, kostu horiek jarduera benetan egiten den epeari badagozkio.

28. artikulua. Justifikatzeko bideak.

1. Ezarritako baldintzak eta dirulaguntza eman zenean aurreikusitako helburuak bete direla egiaztatzeko onuradunak honako bideak erabiliko ditu: justifikazio-kontua, modulokako egiaztatzea, eta kontabilitate egoerak.

2. Oro har justifikazio-kontuaren bidez egingo da justifikazioa.

29. artikulua. Justifikazio-kontuaren edukia eta emateko epea.

1. Justifikatzeko kontu ematea pertsona onuradunaren edo erakunde laguntzailearen nahitaezko egintza da, eta bere barruan ondoko agiriok sartu behar dira aitorlearen erantzukizunaren pean: gastuaren frogagiriak edo dirulaguntzaren helburua bete dela egiaztatu eta balio juridikoa duen beste edozein agiri.

2. Oinarri-arauetan zehaztuko dira justifikazio-kontuak emateko modua eta epea.

Oro har justifikazio-kontuak honako agiriak izango ditu:

2.1. Dirulaguntza eman zenean ezarritako baldintzak bete egin direla egiaztatzen duen jardun-memoria, egindako jarduerak eta lortutako emaitzak azalduta. Aurkeztutako datuek otsailaren 18ko 4/2005 Legearen —emakumen eta gizonen arteko berdintasuna helburu duena— 16. artikulua beteko dute.

2.2. Egindako jardueren kostua justifikatzen duen memoria ekonomikoa, honakoak izango dituena:

a) Jardueraren gastu eta sarreren zerrenda sailkatua, hartzekodun pertsona eta dokumentua identifikaturik, eta zenbatekoa, jaulkipen-eguna, eta baldin badago ordainketa eguna ere azalduta. Dirulaguntza aurrekontu baten arabera eman izan bada, gertatu litezkeen desbideraketen berri emango da.

b) Jarduera dela-eta sortutako gastuen ordainagiriak edo merkataritzarako zirkulazio juridikoan berdin balio dezaketen agiriak, zerrendan azalduta, eta hala badagokio, ordaindu izana egiaztatzen duen dokumentazioa.

c) Koste orokorren eta zerrendan jasotako zeharkako kosteen banakako irizpideak azaltzea, halakorik bada; dirulaguntzaren oinarri-arauek horien oroharreko konpentsazioa aurreikusten dutenean eta justifikatze beharrik ez dagoenean izan ezik.

d) Diruz lagundutako jarduera finantzatu duten beste diru-sarrera eta diru–laguntzen zerrenda zehatza, zenbatekoak, jatorriak eta aplikazioak adierazita.

e) Onuradunak eskatu beharreko hiru aurrekontuak, halakorik egin behar izan badu, diruz lagundu daitekeen gastuaren zenbatekoak 38/2003 Legean ezarritako kopuruak gainditzeagatik.

f) Aplikatu bako geldikinak izatekotan, geldikinok eta geldikinotatik eratorritako interesen ordainketa-gutuna.

Oinarri-arauetan jasotzen ez bada, justifikazio-kontua emateko epea hiru hilabetekoa izango da jarduera egikaritzeko epea amaitzen den unetik zenbatzen hasita.

3. Gorabehera jakin bati begira eman daitezkeen dirulaguntzek laguntza eman aurretik, gorabehera hori egiaztatu beharko da, zuzenbidean onargarria den edozein bide erabilita. Eta bestelako justifikazio ematerik ez da beharko. Dena dela, gorabehera hori badela egiaztatzeko kontrolak egin litezkeela ere aintzatetsi behar da.

4. Dirulaguntza justifikatzeko betebeharra ez betetzeak edo hura behar bezala ez justifikatzeak dirulaguntza itzuli beharra ekarriko du, ordenantza honetan eta 38/2003 Legean aurreikusitako baldintzen arabera.

30. artikulua. Gastuaren frogagiriak baliozkotu eta zigilatzea.

1. Gastuak egiaztatzeko, ordainagiriak eta, ordainagirien pareko balio egiaztatzailea izanik, merkataritzako zirkulazio juridikorako balioa edo eraginkortasun administratiboa duten osterantzeko agiriak erabiliko dira. Agiriok jatorrizkoak izan beharko dira, eta fotokopia konpultsatuak onartu ahal izango dira hala dioten oinarri-arauak daudenean.

2. Dirulaguntza zein ekonomia-ekitaldirako eman eta ekitaldi horretako data agertu behar da ordainagirietan.

3. Diruz lagundutako jarduerak, finantzatzeko, dirulaguntzaz gain, norbere diru-iturriak edo bestelako laguntza edota baliabideak erabiltzen direnean, justifikazioan diruon zenbatekoak, jatorriak eta aplikazioak zehaztu beharko dira.

3. Aurkeztutako fakturen edo ordainagirien jatorrizko agiriei zigilu-marka jarriko zaie, eta bertan justifikatutako eta eskatutako dirulaguntza agertu beharko da, baita egiaztagiriaren zenbatekoa dirulaguntza osoari edo zati bati egozten zaion ere.

Azken kasu horretan, dirulaguntzak eragindako zenbateko osoa ere adierazi beharko da.

31. artikulua. Egiaztatzea.

1. Dirulaguntza ematen duen organoak dirulaguntzaren frogagiriak egiaztatuko ditu, eta hartara, onuradunak edo erakunde laguntzaileak nahitaez aurkeztu beharreko dokumentazioa aztertuko du organo horrek.

2. Beharrezkoa den dokumentazioa jaso eta gero, dirulaguntza kudeatzen duen organoak txostena egingo du azalduz zein mailatan bete diren dirulaguntza eman zeneko helburuak, eta egindako gastuak zein mailatan egokitu zaien helburuoi; eta egoki iritzitako proposamena egingo du, aurkeztutako frogagiriak eta dokumentazioa baliozkotzat joz, edo osterantzean, onuradunak jasotako dirulaguntza osorik edo atalen bat itzuli beharra proposatuz.

3. Dirulaguntzaren frogagirien inguruan egindako egintzak kontu-hartzailetzara igorriko dira, fiskalizatzeko eta txostena egiteko helburuz.

4. Organo emaileak justifikazioaren eta ordainketaren inguruan ebatziko du dirulaguntzaren organo kudeatzailearen proposamenaren arabera, baita egindako fiskalizazioa kontuan hartuta ere. Irizpide horietatik aldentzea erabakitzekotan, ebazpena arrazoitu beharko da.

5. Onuradunari ez zaio beste dirulaguntzarik berriro emango, aurretik jasotakoak behar bezala justifikatuta daudela egiaztatu ez bada.

II. TITULUA

Dirulaguntzak itzultzea

32. artikulua. Dirulaguntza emateko ebazpena baliogabetzea.

1. Dirulaguntza emateko ebazpena honakoek baliobakotu dezakete:

a) Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 62.1 artikuluan adierazitako zioak.

b) Krediturik ez edo kreditu nahikorik ez egotea, indarrean den aurrekontu araudiaren arabera.

2. Dirulaguntza emateko ebazpena baliogabetzeko arrazoiak izango dira antolamendu juridikoari egindako bestelako arau-hausteak, eta batik azaroaren 17ko 38/2003 Legean —dirulaguntzak arautzekoa— jasotakoak urratzen direnean, azaroaren 26ko 30/1992 Legearen —Herri Administrazioen Araubide Juridikoaren eta Administrazio Prozedura Erkidearena— 63. artikuluan ezarritakoarekin bat.

3. Ebazpenak baliogabetzeko arrazoiak izanez gero, dirulaguntza eman duen organoak ofizioz berrikusiko du kasua, edo bestela, kaltegarritzat joko eta aurka egingo dio, azaroaren 26ko 30/1992 Legearekin —Administrazio Publikoen Araubide Juridikoari eta Administrazio Prozedura Erkideari buruzkoa— bat etorriz.

4. Administrazio-adierazpen irmo edota epai irmo bidez dirulaguntza emateko ebazpena deuseztagarri jotzeak, edo are deusezteak, berarekin dakar jasotako diru-kopuruak itzultzeko betebeharra.

5. Legedian aurreikusitako itzulketa-arrazoiren bat tarteko denean, ez da ofiziozko berrikuspenik egingo.

33. artikulua. Itzuli beharra eragiten duten arrazoiak.

1. Jarraian zerrendatuko diren kasuetan, bidezkoa izango da jaso diren kopuruak itzultzeko eskatzea; baita ere dirulaguntza ordaindu zen unetik itzultzea erabaki den unea arteko berandutza-interesak eskatzea ere.

a) Dirulaguntza eskuratzeko baldintzak faltsutuz edo dirulaguntzarik ez ematea eragin litzaketen baldintzak ezkutatuz lortu izana dirulaguntza.

b) Ez betetzea, oso-osoan edo zati batean, dirulaguntza oinarri duen xedea den, jarduera edo proiektua, edo hartu beharreko jarrera.

c) Frogatzeko obligazioa ez betetzea edo jasotako fondoen zertarakoa ez frogatzea nahiko, azaroaren 17ko 38/2003 Legean eta ordenantza honetako arauetan ezarritako moduan.

d) Jardueraren finantzazioaren berri zabaltzeko betebeharrean — ordenantza honetako 9 h) eta 11. artikuluetan jasoa— huts egitea.

e) Legediak eta ordenantza honek aurreikusitako egiaztapen eta finantza kontroleko lanen aurka egiten bada, aitzakiak nahiz oztopoak jartzen bazaizkie, edo uko egiten bazaie, baita ere kontabilitate, erregistro edo dokumentazioa gordetzeko beharrak betetzen ez badira, horren ondorioz ezin bada egiaztatu jasotako funtsak zertan erabili diren, helburua bete den, edo zein diren diruz lagundutako jardueren errealitatea eta erregulartasuna; era berean, edozein administraziok edo erakunde publikok nahiz pribatuk —Espainiako Estatukoak, Europako Batasunekoak edo nazioartekoak izan— helburu bera lortzeko dirulaguntzak, laguntzak, diru-sarrerak edo baliabideak ematen baditu.

f) Abadiño Elizateko Udalak onuradunei eta erakunde laguntzaileei ezarritako betebeharrak eta erakunde laguntzaileek hartutako konpromisoak ez betetzea; baldin eta diru laguntza erabiltzeko erari eragiten badiote edo hari buruzkoak badira, hau da, helburuak lortzeko erari, jarduera egiteko erari, proiektua gauzatzeko erari edota diru laguntza ematea oinarritzen den jokabidea hartzeko erari buruzkoak.

g) Abadiño Elizateko Udalak onuradunei eta erakunde laguntzaileei ezarritako betebeharrak eta erakunde laguntzaileek hartutako konpromisoak —arestian aipatutakoez bestelakoak— betetzen ez badira, eta horren ondorioz ezin bada egiaztatu jasotako funtsak zertan erabili diren, helburua bete den, edo zein diren diruz lagundutako jardueren errealitatea eta erregulartasuna. Era berean, edozein administraziok edo erakunde publikok nahiz pribatuk —Espainiako Estatukoak, Europako Batasunekoak edo nazioartekoak izan— helburu bera lortzeko dirulaguntzak, laguntzak, diru-sarrerak edo baliabideak ematen baditu.

h) Europako Batasuneko Hitzarmeneko 87etik 89ra arteko artikuluetan ezarritakoaren arabera itzuli beharra sortzen duen erabakia hartu izan denean.

i) Dirulaguntzaren araudi eregulatzailean jasotako bestelako kasuetan.

2. Erakunde zein pertsona onuradunak edo erakunde laguntzaileak hartutako konpromisoak ia osotasunean bete dituenean eta konpromiso horiek asebetetzeko egoki jardun duela egiaztatzen denean, itzuli beharrekoaren zenbatekoa zehazteko helburuz, erantzukizun-maila neurtzeko, proportzionalitate-printzipoak beteko dituzten irizpideak aplikatuko dira.

3. Halaber, dirulaguntzak berez edo beste dirulaguntza, laguntza, diru-sarrera edo baliabideekin batera, diruz lagundutako jardueraren kostua gainditzen duenean, itzuli egin beharko da diruz lagundutako jardueraren kostua gainditzen duen diru-kopurua, eta horri dagozkion atzerapen interesak ere eskatu ahal izango dira.

34. artikulua. Itzuli beharreko kredituen izaera, eta itzultzea eskatzeko prozedurak.

1. Itzuli beharreko zenbatekoak zuzenbide publikoko diru-sarreratzat hartuko dira, eta Zergen Foru Arau Orokorrean eta zerga-bilketaren ordenantzan aurreikusitakoa haiek kobratzeko aplikagarria izango da.

2. Dirulaguntzen arloan aplikagarria izango den berandutza-interesa honakoa izango da: diruaren legezko interesa % 25 handitua, baldin eta Estatuko Aurrekontu Orokorren Legeak besterik ezartzen ez badu.

35. artikulua. Preskripzioa

1. Itzulketa aintzatetsi edo likidatzeko eskubidearen preskripzio-epea lau urtekoa izango da.

Kasuan-kasuan erabakiko da epe hori zenbatzeko era.

a) Pertsona onuradunak edo erakunde laguntzaileak justifikazioa aurkezteko epea iraungitzen denetik.

b) Pertsona onuradunaren gorabehera berezia dela-eta emandako dirulaguntzen kasuetan, dirulaguntza eman zeneko unetik.

c) Pertsona onuradunak edo erakunde laguntzaileak epe jakin baterako gorde beharreko edo eutsi beharreko baldintzak edo betebeharrak ezarriz gero, epe hori amaitzen den unetik.

Preskripzio-epearen zenbaketa eten egingo da:

a) Abadiño Elizateko Udalak itzulketa-arrazoietarikoren bat ote dagoen egiaztatzeko xedeaz egindako edozein egintzarengatik, pertsona onuraduna edo erakunde laguntzailea egintza horretaz formalki jabetuta egonik.

b) Edozein motatako errekurtsoak jartzean, erruduntasun-testigantza zigor-jurisdikziora bidaltzean edo fiskaltzari salaketa aurkeztean; baita pertsona onuraduna edo erakunde laguntzailea formalki jakitun dela, errekurtsook bideratzean egindako jardunengatik ere.

c) Pertsona onuradunak edo erakunde laguntzaileak dirulaguntza edo itzulketa likidatzeko xedeaz egindako edozein jardun sinesgarrirengatik.

36. artikulua. Dirulaguntza itzultzeko prozedura ebazteko eskumena.

Onuradunari edo erakunde laguntzaileari dirulaguntzen itzulketa eskatzeko eskumena izango du organo emaileak, itzultzeko aurreikusten diren kasuetariko baten bat gertatzen dela uste duenean.

37. artikulua. Dirulaguntza itzultzeko prozedura.

1. Itzultzeko betebeharra zehazteko prozedurak administrazio-izaera izango du eta araubide izango ditu azaroaren 26ko 30/1992 Legearen —Herri Administrazioen Araubide Juridikoari eta Administrazio Prozedura Erkidegoari buruzkoa— VI. tituluan administrazio prozedurei buruz jasotzen diren xedapen orokorrak, betiere azaroaren 17ko 38/2003 Legean eta lege hori garatzeko xedapenetan ezarritako berezitasunen kaltetan jo gabe.

2. Itzulketa prozedura ebatzi eta ebazpena jakinarazteko gehienezko epea 12 hilekoa izango da, hura hasteko erabakia hartu zen egunetik zenbatuta. Epe hori eten eta luzatu ahal izango da, administrazio prozedura erkidegoari buruzko legedian aurreikusitakoaren arabera. Ebazteko epea beren-beregiko ebazpena jakinarazi gabe agortzen denean, prozedura iraungi egingo da, baina, aldi berean, prozedura amaitu arte jardunekin jarraitu liteke, eta, epe hori amaitu arte ez da ulertuko egindako jarduketen zioz preskripzioa etenda dagoenik.

3. Itzulketa egiteko prozeduraren ebazpenak amaiera emango dio administrazio bideari.

TITULO III

Dirulaguntzen finantza-kontrola.

38. artikulua. Finantza-kontrolaren araubide orokorra.

1. Dirulaguntzen gaineko finantza-kontrola ezarriko zaie dirulaguntzak jaso dituzten pertsona onuradunei eta Abadiñoko Udalaren dirulaguntzak jasotzearren erakunde laguntzaile direnei, kontu-hartzailetzaren bidez, eta azaroaren 17ko 38/2003 Legean jasotako aurreikuspenekin — kontrolatzaileen betebehar eta ahalmenak; kontrolerako jardunen prozedura eta dokumentazioa— bat.

2. Dirulaguntzen finantza-kontrolaren xedea honako hauek egiaztatzea izango da:

a) Pertsona onuradunak dirulaguntza egokia eta zuzena jaso ote duen.

b) Pertsona onuradunek eta erakunde laguntzaileek dirulaguntzaren kudeaketan eta ezarpenean beren betebeharrak bete ote dituzten.

c) Pertsona onuradunek eta erakunde laguntzaileek dirulaguntza behar bezala eta zuzenki frogatu ote duten.

d) Pertsona onuradunek eta erakunde laguntzaileek aurkeztutako frogagirien arabera, egindako eragiketak dirulaguntzaren bidez benetan eta erregulartasun osoz finantzatu ote diren.

e) Diruz lagundutako jarduerak egoki eta zuzenki finantzatu ote diren, hau da, legedian eta ordenantza honetan ezarritako eran.

f) Pertsona onuradunek eta erakunde laguntzaileek administrazioari aitortu ez dioten eta hona zerrendatuko direnetan eraginik izan dezakeen egitaterik, inguruabarrik edo egoerarik ote dagoen: diruz lagundutako jardueraren finantzaketan, dirul

Azken aldaketa: 2009/11/08